Vi har mange frivillige organisasjonar i Fjaler – ca 90 og har eit rikt, aktivt og blomstrande kulturliv. Vi har også eit folkeakademi, stifta i 1993. Det har som andre lag gått i bølgjedalar – for kven vil ta på seg endå eit styreverv og bruke fritida og sjela si for andre år etter år? Dei er ikkje alltid så lette å finne! No strevar akademiet verkeleg for å halde det gåande…

Vi kan stille oss nokre spørsmål:

- Veit folk i Fjaler nok om folkeakademiet? At dei kan vere arrangør, tilby turneprogram og yte tilskot. At det er klåre retningsliner med både fylkes- og nasjonalt ledd med samlingar. Her er faktisk mange spennande moglegheiter!

- Kan eit anna lag i Fjaler ta over akademiet? Kva for eitt?

- Kan vi slå Fjaler saman med dei aktive folkeakademia i nabokommunane Askvoll og/ eller Hyllestad?

- Eller skal det berre leggast ned?

Ja, kor skal vegen gå?

Noko av problemet har vore at ingen ville leggje si sjel i arbeidet.. Det knip hardt ved kvart årsmøte, valnemnda har vanskar med å få fatt i folk, det blir mange ringerunder. Til no har det alltid stilt opp ein person eller tre som seier: ok, eg tek det på meg for å halde det gåande, men eg vil eller kan ikkje gjere så mykje …. Frivilligsentralen har utført sekretærjobben i mange år, men er det rett at dei skal drive folkeakademiet?

Styret handsama denne saka i møte 24. februar og har framlegg til årsmøtet den 24. mars om å leggje ned Folkeakademiet Fjaler etter årsmøtet.

Kva tykkjer du? Vil vi sakne folkeakademiet i Fjaler? Har du synspunkt?

Sjå meir om Folkeakademiet www.folkeakademiet.no
Ta gjerne kontakt med styret i Folkeakadmiet Fjaler v/ Øyfrid Ulvedal Strand, Sylvi Joan Folkestad eller Leonie Merts-Koning eller sekretariatet som er Frivilligsentralen i Fjaler i Dale senter tlf 57 73 80 20

- og kom gjerne på årsmøtet 24. mars kl 19.30 på Transplant!

Oddgeir Bruaset reiste i folkeakademiet hausten 2009.